港聞

港聞二

【Emily】葉劉又貼旗袍相:你食咗月餅未?

【明報專訊】新民黨主席葉劉淑儀前排同黨內一班兄弟姊妹影咗輯旗袍西裝相,佢噚日晨早趁住國慶及中秋佳節,上載自己嘅個人旗袍相,9張相換咗4款旗袍,張張都配上唔同字句。其中一張,身穿藍色旗袍嘅葉太右手拎住月餅、左手揸住電話聽筒,配上「你食咗月餅未?」呢句。

民建聯都有出片賀中秋同國慶,港島區立法會議員張國鈞就派任務畀佢團隊嘅3個「才子」,去挑戰其他民記立法會議員「猜燈謎」,分別出咗「爬竹竿」、「游泳比賽」、「聽診器」3個題目要猜四字,又出咗「三張紙」叫猜一字,被佢哋挑戰嘅議員都估到,唔知大家又估唔估到呢?

民記議員玩猜燈謎

出登高唱歌片

另一條片就係民記立法會議員陳克勤、劉國勳聯同其團隊,去咗烏蛟騰烈士紀念園向英烈致敬。克勤喺片中話噚日係國家國慶71周年大喜日子,歡慶之餘亦要感謝前人付出嘅血汗,作為中國人更加要銘記歷史。佢哋幫手抹烈士石碑、獻花,並唱國歌。而柯創盛、民建聯副秘書長黎榮浩聯同民建聯九龍東兄弟出音樂短片,成班人登高唱《勇敢的中國人》,柯仔同黎榮浩仲輪流喺山上揮動國旗𠻹。

相關字詞﹕國慶 中秋節 民建聯 葉劉淑儀

上 / 下一篇新聞