港聞

港聞二

【Emily】去年因一粒牛肉 關水飯房錯過福利 憶囚友送月餅 阿臻:原來咁好味

【明報專訊】噚日中秋節,社福界立法會議員邵家臻憶起舊年同一日,自己喺監獄度過,但因囚友請食一粒牛肉球,而被罰關押喺冇福利嘅「水飯房」,錯過咗一年一度嘅派月餅;之後離開水飯房,阿臻發現有囚友收埋咗嗰月餅,等佢出嚟嘅時候一齊分享。

探囚友父母 憶手足12港人

阿臻話監獄喺中秋節時,囚友會獲加餸,包括雞髀一隻、廚師腸一條、雪梨一個,而「從教會捐贈的兩個月餅,大家都隆而重之」。點知舊年臨近中秋時,有囚友請佢食咗一粒牛肉球,懲教人員話阿臻犯咗「藏有及使用不屬於我的食物罪」,結果同枱嘅兩人加阿臻被關押喺冇福利嘅「水飯房」3日,剛好錯過咗迎月、賞月、追月。

當阿臻離開水飯房後,竟然有囚友收埋咗個月餅畀佢,「躡手躡腳下,我一啖解決四分一個月餅」。阿臻話月餅係佢少有唔鍾意嘅甜食,但喺嗰日佢發現,原來月餅咁好味。

今年中秋,阿臻話自己獨個兒食住四分之一個月餅,仲去家訪嗰位一同入「水飯房」囚友嘅父母,而佢亦想念住在囚嘅手足同12名被內地扣押嘅港人。

相關字詞﹕中秋節 邵家臻

上 / 下一篇新聞