港聞

港聞二

【Emily】葉國謙:民建聯議員都關心陳同佳案

【明報專訊】台灣殺人案疑犯陳同佳仍未赴台投案,死者潘曉穎嘅媽媽日前接受傳媒訪問時話,民建聯相關人等自去年中開始,雖然話會跟進,但冇乜實質行動。行政會議成員、民建聯葉國謙噚日話,如有需要願意接觸潘媽媽,「民建聯任何一位議員,呢方面(陳同佳事件)都非常之關心」,又指如果潘太認為民建聯有不足,亦會檢討。

但葉國謙強調,陳同佳去台灣投案係佢良心上感覺到有需要,「政府無任何動作可以做,我哋唔能夠喺冇法(例)嘅情况下將陳同佳引渡去台灣」,只係強調希望陳同佳盡早去到台灣接受公平審訊。

警方早前承認陳同佳仍居於安全屋。民主黨立法會議員許智峯質疑,陳同佳唔符合《證人保護條例》嘅證人資格,但警方仍畀佢住安全屋,批評等同窩藏罪犯,做法不公義,令受害者家屬遭二次傷害。許智峯並引述《證人保護條例》第15條指,如果「保護證人計劃」參與者喺境外干犯可被逮捕罪行,境外執法機構可要求香港當局透露涉案者資料,並由該機構人員與涉案者會晤,佢亦去信台灣法務部提出上述觀點,希望台灣執法機構知悉有關權利、向香港警方提出跟進陳案。

相關字詞﹕境外 殺人 葉國謙 台灣殺人案 引渡 陳同佳 許智峯 民建聯 台灣

上 / 下一篇新聞