港聞

港聞二

【Emily】郭偉强挺「阿牛」動議 諷議會自閹

【明報專訊】民主派喺東區區議會佔大多數主導,工聯會郭偉强係少數建制派。噚日東區區議會會議途中約3點半,郭偉强就喺facebook度報告「阿牛」(社民連曾健成)提出加議程討論「要求容許向《施政報告》發表意見」,佢都投贊成票,但動議最後被否決。郭偉强揶揄,「原來現屆東區區議會喜歡自貶自閹」。據了解,因為阿牛事前無同其他民主派傾過,所以唔係每個議員都有準備,結果動議喺9票同意、0票反對、25票棄權下不獲通過。

東區區議會副主席、民主黨趙家賢同Emily講,佢提出將東區區議會跟進開嘅地區工程項目等,寫入去畀行政長官,叫佢喺施政報告跟進,會後再問大家攞意見。佢從政府內部消息人士知道政府唔會就施政報告諮詢區議會,所以佢噚日即場問咗民政專員,提出佢作為副主席收集意見去信,睇吓到時以正副區議會主席定係區議會秘書處代表議會去信。

副主席趙家賢批郭「搞事」

佢批評郭偉强「經常早走,就喺度搞事」,噚日會議未完,郭偉强下晝4點鐘就走咗,而噚日會議開到傍晚6點先結束。

相關字詞﹕東區區議會 趙家賢 曾健成 郭偉强

上 / 下一篇新聞