港聞

港聞二

【Emily】七一吧10‧30結業:非關打壓

【明報專訊】「七一吧」(Club 71)位於中環百子里公園,前身係位於蘭桂坊嘅「六四吧」,無論係「七一吧」定「六四吧」,都係社運人同文化人嘅聚腳地,但係「七一吧」因為業主拒絕續租,宣布會喺10月30日結業。「七一吧」負責人馬麗華前日喺「七一吧」facebook公布呢個消息,話幾日前業主拒絕續租,除非10月份開始繳交原租約嘅租金,否則30日要立刻交舖,即走。佢話,好彩業主諗到好頭好尾,畀佢哋可以多留一個月,「真巧,就是當年六四吧結業的日子,2004年10月30日」。

澄清免費飲酒謠言 長毛:朋友請

馬麗華寄語,願愛長存、與港同行。有人留言認為係「打壓黃店開始啦」、「𠵱家環境有人交租準時都唔續租講唔通」;馬麗華回應話「這是業主貪婪,非關打壓黃店」,「我去年7月開始有遲交租,但業主一直手持兩個月按金,絕對唔會蝕錢」。

「六四吧」(Club 64)1990年喺蘭桂坊開張,喺2004同樣因為租金問題而結業,不過嗰次係因為加租。立法會前議員、社民連梁國雄(長毛)話,以前經朋友介紹喺「六四吧」做過幾個月酒保,但變成「七一吧」後因為唔就腳就少咗去,佢話自己去七一吧飲酒唔使畀錢係謠言,只係有時撞到啲朋友會請佢飲酒,而的確佢去「六四吧」有一排冇收佢錢。佢話如果「七一吧」將來再開業,咁就「最好啦」。

相關字詞﹕六四 七一

上 / 下一篇新聞