港聞

港聞二

【Emily】泛民撐利君雅 吳秋北:叫林鄭「講人話」涉人身攻擊

【明報專訊】港台助理節目主任利君雅暫未能通過3年公務員試用期,試用期被延長120日,前日消息一出即引來政界中人評論。多名民主派議員噚日喺網上力撐利君雅,包括民主黨許智峯、林卓廷等,阿廷批評「逼害記者可恥」。建制派就唔係咁諗,港區人大代表吳秋北覺得,利君雅被奉為「女神」,係「帶衰媒體價值取向」。

多名民主派議員喺facebook聲援利君雅,公民黨黨魁楊岳橋認為,利君雅喺舊年7月至11月記者會嘅表現「好好」;黨主席梁家傑亦叫利君雅「加油」。

楊岳橋:記者會利表現「好好」

舊年7月,利君雅喺記者會上叫特首林鄭月娥「講人話」,吳秋北噚日重提呢件事,話「咄咄逼人姑且算是一種訪問技巧」,但要求受訪者「講人話」就「涉嫌人身攻擊了吧」,反問點可以「姑息縱容,吹捧利用」呢啲記者。

吳:港台效忠政府係本分

吳秋北認為,港台作為「官媒」,向特首負責,效忠政府係本分,不分立場階層、為全社會服務係本職,「正本清源正正是港台,是公務員隊伍的當務之急」。新民黨李梓敬噚日喺fb發文,叫覺得利君雅有問題嘅人讚好,未夠半日,有近7000人「畀like」。

相關字詞﹕公務員 港台 利君雅

上 / 下一篇新聞