港聞

港聞二

【Emily】明年赴星洲任大學院長 沈祖堯幫手搵人變咗自己做

【明報專訊】香港中文大學前校長、現任內科及藥物治療學系莫慶堯醫學講座教授沈祖堯出年4月會去新加坡南洋理工大學出任醫學院院長同高級副校長,不過噚日佢見記者時一時醒唔起自己去嘅大學叫「南洋理工大學」定「南洋科技大學」。後尾佢都講番啱,仲話本來無打算去新加坡做嘢,只係幫手搵大學醫學院院長,「搵吓搵吓就搵咗自己去做」,強調越洋做嘢同香港學術自由無關。

沈祖堯話南洋理工大學係工科上好著名嘅大學,同醫學上有好多合作空間,尤其喺人工智能、機械人等範疇,「如果我喺我嘅事業最後尾幾年,可以做多啲呢方面嘅工作,我覺得好開心」。

聞袁國勇被批提問 「約咗人,走先」

𠵱家各國都實施緊外遊限制,沈祖堯話自己仲有半年時間喺香港,希望到時疫情已經過去或紓緩。佢話希望去到新加坡後建立當地同香港之間合作;2003年SARS佢認識新加坡嘅傳染病專家,對方想同香港有更多交流,因為兩地有相似之處,防疫上有合作空間。最後記者問到點睇港大微生物學系講座教授袁國勇多次被批評,沈祖堯即刻笑住話「我約咗人呀,走先啦!」,無答問題就轉身走。

上 / 下一篇新聞