港聞

港聞二

【Emily】青民倡特首設制度 畀港人參軍

【明報專訊】政府正就新一份《施政報告》諮詢,青年民建聯噚日發表報告提出期望,其中希望特首容許港人參軍。報告建議特首設立適當制度,容許有志從軍嘅香港居民入伍。青年民建聯主席施永泰話,最近已經有政策容許港人喺廣東省做公務員,所以覺得政府可以再進一步,容許港人參軍,但強調呢個屬自由選項。

優先容許內地讀大學學生入伍

報告建議優先容許喺內地就讀大學嘅香港學生應徵入伍,同時提供資助,並考慮保留佢哋嘅入學資格或學籍,容許退役後再入學,以及享受學費減免。青年民建聯副秘書長陳壇丹強調,參軍與否係自由選擇,𠵱家唔係話要強行徵兵,建議嘅原意只想為港人提供多一個體驗同選擇。

教育方面,報告建議政府將通識科定為選修科,並要求所有學校公開教材供公眾查閱。施永泰解釋,通識科過往引起唔少爭議,希望藉此增加科目透明度。

上 / 下一篇新聞