港聞

港聞二

【Emily】調查:逾四成青年想彈性上下班

【明報專訊】疫情爆發期間,為保持社交距離,工作環境都有轉變。青協青年研究中心成立嘅「青年創研庫」,6月中做咗個關於「職場新常態」嘅調查,訪問521個20至39歲全職工作青年。結果發現,超過四成受訪者希望僱主安排「彈性上下班時間」,另有超過兩成想喺屋企或遙距辦公,主要認為彈性工作可更靈活運用時間。

調查又訪問咗專家,包括工商管理學者、立法會議員同企業代表等,佢哋雖然都期望有彈性工作安排,平衡僱主同僱員需求,但就話安排受限於工種性質,亦會有管理困難等,不過相信疫情期間,有唔少公司嘗試咗新做法,可以為未來彈性工作安排提供參考。

青年創研庫:香港職場欠彈性

青年創研庫民生組召集人陳昌堅話,大部分僱主一直未做好準備安排彈性工作,而根據調查,疫情期間可以在家工作嘅受訪者少過兩成,反映香港職場仍欠彈性,所以認為政府應改良「遙距營商計劃」,為推行彈性工作安排增添空間同動力。

相關字詞﹕新常態 青協 青年創研庫 在家工作 彈性工作

上 / 下一篇新聞