港聞

港聞二

【Emily】「都係街坊」 區議員助新移民填表取1萬

【明報專訊】關愛基金向低收入新移民派一萬元,噚日開始接受申請。元朗區議員陳樹暉噚日同Emily講,呢幾日都有協助街坊填表。被問會否因此遭其他本土派市民怪責,佢就話自己有喺街坊通訊群組中解釋,話區內新移民嘅比例高,始終要鞏固民主派畀不同市民嘅觀感,反問「唔通送畀隔籬嘅工聯會、民建聯咩?」

「唔通送畀工聯會、民建聯咩?」

陳樹暉話一來新移民都係街坊,二來亦覺得坊間有唔少對新移民嘅偏見,佢話其實亦有新移民好努力工作。對於有區議員早前因政見,拒絕服務部分街坊,陳樹暉話「大家各自有唔同嘅承擔,如果佢哋回應到坊間質疑,咁就冇問題」。

關愛基金專責小組委託中銀協助派錢,小組主席、勞工及福利局長羅致光噚日到其中一間分行視察,了解佢哋接受同檢查申請嘅工作。羅致光話首日運作大致暢順,分階段接受申請亦便利申請人,感謝代理銀行喺星期日作出特別安排,喺唔同地區開放共17間分行,方便市民遞交表格。

上 / 下一篇新聞