港聞

港聞二

【Emily】泛民民調提前有結果 鍾庭耀感安慰

【明報專訊】民主黨委託香港民研做民調定議會去留,原預計下周三(30號)有結果,但香港民研主席兼行政總裁鍾庭耀噚日話民調進度相當好,估計噚日有機會做晒電話訪問,應該下周二可公布結果。

鍾庭耀話受訪市民都合作,佢相信出現唔可靠,或弄虛作假嘅結果唔會太多,話之前都擔心市民唔肯答,或有人動員影響調查氣氛,但調查中冇出現呢啲情况,佢對調查進度感安慰。

今次民調淨係做電話訪問,鍾分享有趣觀察,今個星期「我們香港人意見群組調查」有成1300個新報名成員,話如果佢哋係想參與回答民主派去留問題,就要失望喇;佢哋亦收到啲「另類意見表達」,包括冇內容嘅電郵,淨係標題寫住「我支持泛民……」,估計係以為佢哋會綜合埋電郵意見。

話政府唔理民意數字 取消施政報告調查

《施政報告》下月14日公布,香港民研每年都會調查市民期望,鍾庭耀話今年決定取消,一嚟係資源問題;亦見到由上年起,市民嘅訴求集中喺「成立獨立調查委員會」嘅社會運動訴求,覺得呢啲特殊訴求,政府唔會處理民意數字,倒不如暫時取消。

相關字詞﹕民調 議員去留 鍾庭耀 香港民研

上 / 下一篇新聞