港聞

港聞二

【Emily】海園行山水族館瑜伽 加$80就得

【明報專訊】海洋公園除咗睇動物同玩機動遊戲,下個月仲推出「森度遊」,首次開放纜車索道小徑,由導賞員帶領市民登上南朗山。另外市民可以喺人工湖水面做SUP Yoga(直立板瑜伽),考驗平衡力;又可以喺水族館做瑜伽同冥想。持即日門票、全年入場證或無限次入場證嘅訪客,加80元就可參加以上活動,收費會全數撥捐海洋公園保育基金。

去到11月,海洋公園會推出露營活動,營地有空調帳幕、淋浴設施等,包燒烤晚餐、早餐等。海洋公園營業、市務及公共事務執行總監蕭學軍話,活動定價喺3000元以下,詳情稍後公布。

海洋公園早前財困要立法會撥款,公園主席劉鳴煒話,推出「森度遊」係重新審視公園營運,聽取各方意見後嘅結果,唔係希望透過「森度遊」轉虧為盈,而係尋找公園新方向。

另外,昂坪360同運動品牌FILA今日起喺昂坪市集推出「360 FILA Sports Fest」戶外運動節。市民憑昂坪纜車門票同埋喺昂坪市集商戶單一消費滿100蚊,可換領「互動運動挑戰」遊戲卡,試玩「巨型保齡球賽」、「極速單車隊」等互動運動挑戰。市集內亦有運動場景裝置畀市民「打卡」,市民將照片上載個人社交網站並標誌活動主題標籤可獲贈品,亦有機會參加抽獎。詳情可見昂坪360網站。

相關字詞﹕昂坪360 海洋公園

上 / 下一篇新聞