港聞

港聞二

【Emily】將隧轉車站10‧2啟用 有25巴士線

【明報專訊】將軍澳區內交通較倚重港鐵,運輸署噚日宣布,將軍澳隧道往將軍澳方向嘅巴士轉乘站將於10月2日(下周五)啟用,到時會有25條巴士線停該站,包括15條全日服務巴士線、4條凌晨時段巴士線以及6條繁忙時段服務嘅巴士線,其中九巴會開辦一條新嘅98號循環線,來往將軍澳工業邨同牛頭角站;新巴亦會開辦一條797號循環線,來往日出康城同九龍灣。

相片所見,轉乘站工程應已大致完成,運輸署話,轉乘站設有洗手間、候車上蓋、座位及預計巴士到站時間嘅顯示屏。不過,轉乘站暫時只會開通入將軍澳方向,由將軍澳出市區方向嘅轉乘站仍未開。九巴話,由將軍澳出市區嘅人可以搭到去觀塘道轉車站再轉車,九巴早前已為觀塘道轉車站沿途64個巴士站,編上候車月台編號,乘客可以根據App或車廂廣播,搵番相應嘅月台編號轉車。

上 / 下一篇新聞