港聞

港聞二

【Emily】冬日節倒數煙花照籌備 旅局盼搞得成

【明報專訊】舊年反修例運動下無除夕倒數煙花,今年疫情下國慶無煙花,雖然未知年底咩環境,但旅發局暫時無叫停秋冬計劃,總幹事程鼎一話會繼續籌備繽紛冬日節及煙花倒數,希望搞得成。

出VR片畀旅客睇香港風景

𠵱家各地都無得旅行,為保持香港曝光率,旅發局整咗條VR360片段,下個月推出,航拍香港嘅青山、綠水同田野,仲可以畀人360度調校角度,如可以從山頂望落山腳,又可以由山腳望番上山頂,鍾意點睇都得,等外國旅客無得嚟香港都可以睇吓片。

除咗吸引旅客,旅發局亦鼓勵港人遊香港,程鼎一提議「既然無法去旅行,不如自救」。佢話等待疫情回穩,政府放寬限聚令至二三十人,將會推「賞你遊香港」,港人消費滿指定金額,初步構思可憑800至1000元單據,換約4小時本地遊,包一餐同交通,設1萬個名額,有得揀約50個行程,包括三級歷史建築「F11 Foto Museum」、大澳蝦膏工場等。

政府與唔同地方傾緊旅遊氣泡同健康碼,程鼎一估計大灣區較快開到,旅發局會就此推廣,以商務旅客及年輕客為目標,配合優惠,並強調本港衛生安全,正構思衛生防疫指引畀旅遊、零售、餐飲業,以便旅客辨識。

上 / 下一篇新聞