港聞

港聞二

【Emily】《理大圍城》映前兩個鐘被列三級 未成年觀眾需臨時退票

【明報專訊】唔少同反修例運動有關嘅電影相繼公映。紀錄片《理大圍城》原定喺9月21至23日放映,發行商「影意志」噚晚突然喺facebook宣布,該片於放映兩個鐘前被電檢處列為III級,搞到要臨時為18歲以下觀眾退票。

影意志話,7月中起為《理大圍城》同另一套紀錄片《佔領立法會》申請電檢證明書;電檢處曾要求為兩部片加上「部分描述或行為,根據現行法例可能會構成刑事罪行」警告字句,而《理大圍城》要再加「影片部分內容或評論亦可能未獲證實或有誤導成份」。

影意志話9月初曾向處方提出,標明警告由電檢處發出,處方拒絕,最終影意志喺9月18日按要求加上字句。

影意志喺fb話「電檢處告示並不代表導演團隊立場」。佢哋批評電檢處「以保障各方為由,實屬保障自己之實來強逼修改影片」,又話唔希望為業界帶來錯誤先例,但為咗順利放映先暫時接受條件,但一定會上訴。

睇番資料,《理大圍城》曾經喺今年1月、5月同6月,分別於香港獨立電影節同香港藝術中心等上映,當時未被列為三級。至於電檢處點解改評級,至截稿時處方無回覆本報查詢。

相關字詞﹕電檢處 影意志 理大圍城

上 / 下一篇新聞