港聞

港聞二

【Emily】行管會無泛民 卿姐問阿廷點解唔加入

【明報專訊】民主黨前主席劉慧卿噚日喺網台節目《議會內外》,訪問黨友兼立法會議員林卓廷。面對延任爭議,民主黨一直話要寸土必爭,但噚日講起立法會行政管理委員會內目前冇民主派嘅成員,卿姐問阿廷:「點解放棄咗佢?咁你又話下個月想參加立法會(延任),有個行管會又唔參加,即係咩意思呢?」阿廷解釋,話行管會係閉門會議,而且由建制派議員佔多數,「入面啲人唔聽你講,你對外又唔講得」。

目前行管會13名委員均由建制派議員擔任,立法會主席梁君彥兼任主席。阿廷話行管會會議內容要保密,市民監察唔到,大嘆「咁你冇辦法喎」。不過卿姐似乎唔多同意,認為有啲委員會,民主派要入番去,指行管會負責管理立法會秘書處。卿姐話自己做立法會議員嘅時候,一直都係行管會成員,成日提醒立法會秘書處要客觀、專業。雖然行管會成員唔可以透露會議內容,但卿姐覺得至少可以講自己嘅睇法。

相關字詞﹕劉慧卿 林卓廷 立法會 行政管理委員會

上 / 下一篇新聞