港聞

港聞二

【Emily】大聲讀街坊手牌 區議員奇招阻聚賭

【明報專訊】唔少區議員都為區內聚賭問題苦惱,離島區議員王進洋為打擊賭檔,就出咗奇招。話說佢已經知道有禮貌勸喻係冇用,所以事先叫助理影定有關人等嘅大頭相,佢就直接大大聲朗讀聚賭街坊手上嘅牌,以整停賭檔運作。唔少網民都分享帖文,大讚「呢招絕」、「呢招好毒」。

不過,使出奇招都要冒風險嘅,阿洋噚日喺facebook分享事件時,就話有聚賭街坊想衝過去打佢;睇佢上載嘅照片,亦見到有年老街坊相當激動,要旁人勸阻。另外,有人就鬧阿洋做咗區議員「一朝得志,語無倫次」、「睇X住黎(嚟)」、「老人家黎(嚟)架(㗎),X你老母」。

阿洋就話,佢由2018年至今接過太多有關聚賭嘅投訴,包括有街坊因為賭錢而打鬥,甚至要防暴警察到場;仲有街坊每晚賭錢「萬萬聲上落」、引發家暴事件。佢話會繼續處理屋邨聚賭問題,唔知其他區議員會唔會仿效呢?

相關字詞﹕聚賭 王進洋

上 / 下一篇新聞