港聞

港聞二

【Emily】慢必地區辦「結業」派物資

【明報專訊】人民力量立法會議員陳志全(慢必)早前表態唔延任,噚日宣布將軍澳地區辦事處下周三「光榮結業」,街坊可以免費攞走辦事處內嘅家俬、漫畫等物資。慢必助理蘇浩同Emily講,一班同事都支持慢必嘅決定,但𠵱家市道唔好,「光榮失業」後亦唯有見步行步。

助理「光榮失業」見步行步

慢必噚日喺facebook宣布結束議辦消息,佢話鑑於今屆立法會4年會期即將屆滿,喺冇民意授權下,佢絕唔接受人大提出嘅延長任期。佢感謝街坊多年支持,並叫「香港加油」。疫下經濟唔好,蘇浩都同慢必計劃緊,未來一年可能製作一啲網台節目,笑言希望可以「搵兩餐」。

慢必做咗兩屆立法會議員,蘇浩話佢亦喺呢個辦事處工作接近8年,形容慢必係一個「唔係好嚴」嘅老細。到咗講再見嘅時候,蘇浩有啲唔捨得,最掛心街坊嘅情况,佢話𠵱家要將街坊個案轉介畀其他區議員處理。

相關字詞﹕蘇浩 人民力量 結業 地區辦事處 陳志全

上 / 下一篇新聞