港聞

港聞二

【Emily】CY斥楊潤雄「為官避事平生恥」

【明報專訊】前特首梁振英(CY)噚日喺facebook批評教育局長楊潤雄,話局方只譴責,但唔公開做咗普遍社會不可接受行為嘅教師及涉事嘅學校名,態度係「你信我啦,我做咗嘢,唔好搞大佢」,批評楊「為官避事平生恥」。

教局:發表意見要基於事實

教育局發言人回覆Emily,話局長重視教育質素,局方一直嚴肅跟進及處理每宗涉及懷疑失德老師個案,以學生福祉為依歸,無懼失德教師及壓力團體挑戰,從來無「唔好搞大佢」嘅不負責任態度,對於呢個說法實在不明所以,希望大家發表意見或批評時,都係建基於事實。

CY引述楊潤雄前日接受民建聯主席李慧琼訪問時話「若教師做出普遍社會不可接受的行為,包括用惡毒言語咒罵或詛咒他人,當局亦會採取行動」;CY問:「行動?教育局至今採取了什麼行動?」佢話教育局堅持唔公開被譴責和警告嘅教師姓名同學校,家長被蒙在鼓裏。CY質疑,「在這樣大是大非的問題上,這是負責任的表現嗎?」

相關字詞﹕教育局 楊潤雄 梁振英

上 / 下一篇新聞