港聞

港聞二

【Emily】中通社訪問「陳曉峰」定「陳曉鋒」?

【明報專訊】12名港人涉非法越境被內地扣留,議會陣線朱凱廸、民主黨涂謹申上周六陪同12人嘅家屬見記者。中通社本月13日引述「港區全國人大代表、香港與內地法律專業聯合會會長陳曉峰」接受佢哋訪問,質疑阿涂一開口就講英文係向美國「交功課」。陳曉峰(Nick)噚日同Emily講,接受中通社訪問嗰位唔係佢,質疑係另有其人,可能係「陳曉鋒」,即係基本法委員會委員梁美芬嘅徒弟、法學博士陳曉鋒(Louis)。不過,Louis亦向Emily表示,佢冇就呢件事接受過中通社訪問。咁奇怪?

陳曉峰係一間國際律師事務所合伙人,佢同Emily講,覺得香港官方語言係中英文都得,而做訪問、受訪者都可自由選擇用中文或英文。

二人否認受訪 中通社稿昨更新後消失

而陳曉鋒係香港法學交流基金會秘書長,佢話噚日有幾個記者都send中通社訪問畀佢,佢向Emily強調冇就呢件事接受過訪問。不過,Louis話訪問中嘅「陳曉峰」都講得有道理,阿涂作為民選議員,應該向自己選民負責,講廣東話更貼地,但佢喺記招一開始唔係講廣東話。

更奇怪嘅係,中通社噚日傍晚更新報道,13日受訪嘅係「香港法律交流基金會秘書長陳曉鋒」。夜晚Emily再發現,中通社有關「陳曉鋒」受訪批評阿涂講英文一稿已消失。

相關字詞﹕陳曉鋒 陳曉峰

上 / 下一篇新聞