港聞

港聞二

【Emily】劉錫賢搵阿彪幫手 工聯偕藝人拍片 多謝國家隊

【明報專訊】普及社區檢測計劃(全民檢測)結束,除咗慰問探望人員,工聯會鄧家彪就同一班香港藝人拍短片,多謝內地檢測人員來港支援,噚日工聯會發布該短片。鄧家彪同Emily講,藝人劉錫賢早前搵佢幫手,話想藉工聯會呢個平台,聚集一班藝人講聲多謝;工聯會已將短片交咗畀中聯辦。

鄧家彪話拍攝當日有十幾個藝人自發到場,令佢覺得好感動。佢話大部分內地檢測人員來自廣東省,相信會認識拍攝短片嘅藝人,認為佢哋睇到段片時會更高興。鄧家彪因為幫手處理亞洲電視欠薪一事認識劉錫賢,劉錫賢喺短片中話非常感謝國家隊支援,指疫情影響香港嘅民生、生計,「大家都好渴望呢個疫情盡快過去」,故更要做檢測搵出隱形患者,切斷傳播鏈。片中亮相者仲有無綫藝員鄭家生、無綫前藝員李鴻杰、亞視前藝員陳靖允等。

相關字詞﹕內地檢測人員 藝人 工聯會

上 / 下一篇新聞