港聞

港聞二

【Emily】保存發黃卡片 惦記40元心意 八旬婆婆尋40年前恩人黃日光

【明報專訊】近年有句話:「好人一生平安」,大埔區議員連桷璋代一名80幾歲嘅婆婆,問好人黃日光先生,「今日安好嗎?」呢名婆婆憑住一張上面個電話號碼仍然停留喺7個數字年代嘅發黃卡片,想搵一個40幾年前喺羅湖火車站幫過佢嘅好心人。

連桷璋喺facebook上載呢張發黃卡片,轉述呢件好人好事,話40幾年前有個媽媽一拖五個細路去到羅湖火車站,人生路不熟、人民幣未唱到,幾個細路又係咁嗌肚餓;呢個時候,一個好心人出現,塞咗40蚊人民幣畀呢個媽媽,叫佢快啲買嘢畀細路食,唔肯收番錢,放低張卡片就走咗。

區議員出帖幫忙尋人

當年嘅呢個媽媽今日已經80幾歲,佢希望有機會親口同呢位先生講聲多謝,而張卡片一直珍藏喺銀包內,可惜7個字嘅電話號碼已經打唔通,間廠(時代皮具手袋出品廠)亦已經搬走埋。

連桷璋發帖代尋人,希望搵到黃日光先生,佢話大家或者有疑問,其實區議員係做咩,「對我嘅身份嚟講,自不然每個要求都係case。好老實,10個case可能有一半都係呢個制度解決唔到,當中每個人嘅故事亦都係我以往想像唔到」。帖文半日間已經有逾600人分享,有網民留言諗方法幫手搵人外,唔少人亦「留名睇重逢」。

相關字詞﹕好人一生平安 區議員

上 / 下一篇新聞