港聞

港聞二

【Emily】CY否認全家英籍 話保留告誹謗權利 之鋒籲高官響應放棄外國護照

【明報專訊】前香港眾志秘書長黃之鋒前日畀選舉主任DQ參選資格,佢噚日開記者會回應,特別提到選舉主任話參選人必須「支持、推廣及信奉」《基本法》,對於「信奉」一項佢就話,「我掉轉頭好想懷疑,到底𠵱家啲香港高官,林鄭月娥以至前特首梁振英,佢哋全家都攞住英國護照、做英國人,佢哋又有幾信奉基本法?」全國政協副主席梁振英(CY)立即喺facebook否認有關講法喺事實,批評黃之鋒信口雌黃,保留控告對方誹謗嘅權利。

選舉主任話參選必須信奉基本法

之鋒話首次出現

黃之鋒形容,「信奉」呢個字眼喺今次選舉先首次出現,話「我自己有宗教信仰,係一個基督徒,我就信奉基督教嘅」,質疑香港係咪同內地一樣,「信奉任何宗教前,首先要信奉咗偉大、光明、正確嘅中國香港特區下,基本法嘅領導呢?」認為當局要交代。

梁振英就喺fb話,自己同3個仔女從來都無申請,或者取得任何外國護照或居留權;佢太太梁唐青儀亦已放棄英國護照,批評黃之鋒從來無向佢求證。

梁唐青儀已放棄英國護照

黃之鋒隨後喺fb話支持梁太放棄英國護照,呼籲林鄭同全體高官響應,全家立即放棄外國護照,體現效忠中華人民共和國。

上 / 下一篇新聞