港聞

港聞二

【Emily】被問邊間媒體 TVB記者答「東方星島」

【明報專訊】教育界立法會議員葉建源噚日喺立法會講教協調查,有記者問佢教協會址被指有僭建一事,葉sir問佢係邊間媒體,呢位記者窒住答「東方星島」,不過呢兩間傳媒嘅行家都話唔識佢。呢名記者其後被追問係邊個機構時就跑走,仲衝入保安室,出番嚟後解釋自己係TVB記者,以為葉sir當時問佢睇到邊間傳媒嘅報道,所以先答錯。

被追問跑入立會保安室

其後話聽錯問題先答錯

該TVB記者原來叫章詠欣,問完葉sir問題之後就行開咗,返嚟後就畀一眾記者行家追問佢屬邊間傳媒,佢冇表明身分,只話「我冇冒認呀,我只係睇佢哋嘅報道」,仲立即跑落扶手電梯,更衝咗入去平時外人唔入得嘅立法會保安室。佢其後行出保安室後向大家致歉,話誤以為葉sir問佢睇咗邊間傳媒報道,對於點解唔肯講所屬機構,佢話因為見大家舉機好驚。

其實現場都有行家即刻認得佢係章詠欣,佢曾任港大學生會國事學會主席,2017年特首選舉時為林鄭月娥助選,更出席競選分享大會,仲曾經同國家主席習近平握手,有唔少「威水史」。

上 / 下一篇新聞