港聞

港聞二

【Emily】阿尹收回 唔用賤形容何君堯

【明報專訊】立法會大會噚日繼續審議延展限聚令嘅法案,李慧琼 (Starry)以內會主席身分暫代梁君彥主持大會時,再被民主派議員質疑佢主持會議嘅資格,話佢係「扮主席」,又叫佢做「偽主席」、「假主席」。Starry多次要求民主派議員收番言論,否則要求佢哋離開會議廳。

何君堯發言時,就畀民主黨尹兆堅以規程問題打斷,話何發言離題,何君堯就鬧阿尹唔聽書,「講咗分幾鐘就企起身objection,ob咩jection,人就好似肥,心胸就好窄,無氣喺入面」,更批評泛民妖言惑眾云云。Starry未有要求何君堯收回言論。

何君堯話阿尹心胸好窄

到阿尹發言時,除咗批評Starry主持不公,又鬧番何君堯「聰唔聰明就唔知,最賤一定係佢,最黑一定係佢」。何君堯認為「賤」嘅言論有冒犯,要求阿尹收回,一度搞到要暫停會議。

復會之後,Starry裁定阿尹嘅言論有冒犯性,阿尹就話「賤」字言論係「貴賤」嘅概念,但為免「崩口人忌崩口碗」,佢唔會再用「賤」去形容何君堯。

上 / 下一篇新聞