港聞

港聞二

【Emily】社總副會長 張志偉積極備戰社福界

【明報專訊】社福界議員邵家臻因佔中9人案被判囚8個月,料9月未能競逐連任,現年56歲嘅社總外務副會長張志偉(右)積極考慮參選社福界,口號係「只要堅持,公義必彰」。張志偉噚日同傳媒茶敘,今時今日入到議會都要有抗爭準備,佢話自己相對斯文,但對於阻止開會、被抬走,認為唔大問題,又笑言自己體質OK,耍咗十幾年太極、又係籃球健將,身手都敏捷喎。

張志偉過往做學校、外展工作,近年多做青年就業。佢話有身分喺議會對推動政策改革有功效,加上民主派「35+」(目標取逾半議席)對推動政治生態改變係重要里程碑,認為應該參與。點解係佢?佢話其他社工都醉心前線服務,佢就比較年長、事業發展到最後階段,都想喺業界做啲另類貢獻,又話都有準備「Plan B」。

民主派醞釀如議席過半,若政府拒回應「五大訴求」就否決《財政預算案》,張志偉話今日政治形勢下,睇唔到有其他選擇,但如果民主派擁有否決權,相信政府唔會鐵板一塊不回應。社民連黃浩銘正就判囚3個月以上、5年不得參選規定提司法覆核,一旦成功,阿臻可以捲土重來參選,張志偉就話過往業界都有多於一名民主派候選人參選,相信影響不大,都希望司法覆核成功。左為社福界前議員張國柱。

相關字詞﹕預算案 邵家臻 佔中九子 五大訴求 司法覆核 民主派

上 / 下一篇新聞