港聞

港聞二

【Emily】林鄭引「曼德拉名言」道歉

【明報專訊】教育局要求考評局撤銷中學文憑試歷史科試題引起軒然大波,特首林鄭月娥噚日回應時就「引述」南非已故前總統曼德拉嘅言論,話「教育的崩潰足以摧毁一個國家(the collapse of education is a collapse of the nation)」,事後唔少網民質疑出處。Emily向曼德拉基金會求證,檔案館館長Razia Saleh話佢翻查咗過千五篇曼德拉演辭嘅資料庫、曼德拉嘅名言書籍同作品,都無發現呢句說話。佢又話,多年嚟遇過唔少無法證明嘅曼德拉名言,呢段係其中之一。

曼德拉基金會:無呢句話

林太「引述」曼德拉,話教育嘅崩潰足以摧毁一個國家,要摧毁一個國家,唔需要原子彈、遠程導彈,只要破壞、弱化佢嘅教育制度。呢段說話出處喺網上引起熱議,中文大學社會科學院客席副教授沈旭暉都加入討論,認為呢句中文版明顯係互聯網「名人金句系列」隨便揀個名人、配一句句子嘅fake news(假新聞)。

特首辦噚晚回應,話留意到引述有唔同版本同出處,「樂意接受指正」,如果因而引起誤會,表示歉意。特首辦又話,曼德拉有教無類嘅教育理念舉世公認,特區政府同樣十分重視教育,會繼續肩負確保教育質素嘅責任。

上 / 下一篇新聞