港聞

港聞二

【Emily】85歲高黃美芸 打網球跑步煲韓劇

【明報專訊】85歲、「光纖之父」高錕教授妻子高黃美芸最近接受馬會《駿步人生》訪問,分享生活同養生之道。高黃美芸話,自從高錕年半前離世,加上兩個仔女都喺外國定居,佢獨自喺香港生活,每朝6點起身,午後通常小睡一下,每星期打兩三次網球,每次兩個鐘;如果雨天就會跑步,每次約一個鐘,又話閒時都鍾意「煲」韓劇。

高黃美芸話,早年被仔女「告誡」下,亦養成少鹽、少油,多食生果同蔬菜嘅飲食習慣,仲話飲食健康同多做運動,有可能減低年紀大患上腦退化病嘅風險。佢又話60歲時首次試玩滑翔傘,體驗翱翔天際嘅自由,講笑話如果轉世,希望可以做雀仔。

講開高錕,高黃美芸分享話,喺高錕患上腦退化病初期,曾經好徬徨,加上自己耐性唔夠,難免向高錕發脾氣,但每次高錕見佢發脾氣都好驚,佢漸漸學習以笑相待,就算假笑都要扮落去,結果一扮就幾年,「不知不覺間,假笑也變成了真笑」。佢又感謝馬會捐助,令「賽馬會高錕腦伴同行」流動車服務可以咁成功,及早識別腦退化患者同安排社區護理服務。

上 / 下一篇新聞