港聞

港聞二

【Emily】前三和公立學校 變導盲犬學堂

【明報專訊】香港導盲犬服務中心獲批政府資助,將打鼓嶺蓮麻坑路嘅前三和公立學校,發展成導盲犬訓練學校,將成為全港首個具規模嘅導盲犬訓練學校,預計明年夏季入伙。

發展局長黃偉綸噚日喺網誌話,政府去年2月推出10億元資助計劃,鼓勵非牟利機構申請租用空置用地或校舍。截至今年3月,已為8宗申請批出資助,涉撥款約7200萬元,其中成功獲批嘅就係香港導盲犬服務中心。

香港導盲犬服務中心主席張偉民話,由於中心規模較細,難籌集復修空置校舍所需嘅費用,獲批資助對佢哋「好大嘅鼓舞」。新嘅導盲犬訓練學校將佔地2.45萬平方呎,會設立戶外同室內訓練場、獸醫房、犬舍、犬隻游泳水療設施、導盲犬繁殖區、公共教育和資源中心等。張偉民話現時已完成地盤勘測,預計最快今年內動工,明年夏季入伙,到時將提供較大空間培育同訓練導盲犬,相信學校建成後,除增加受訓犬隻,亦會提高訓練質素,令更多視障者受惠。

上 / 下一篇新聞