港聞

港聞二

【Emily】獻身黃圈 譚文豪替更揸的士 話終於有機會子承父業

【明報專訊】公民黨立法會議員譚文豪(Jeremy)唔揸飛機轉行揸的士?為支持「黃色經濟圈」,Jeremy噚日化身替工的士司機「的士豪」,支持黃色的士車行。Jeremy話細個嘅時候,全靠爸爸辛苦揸的士養起成頭家,形容「終於有機會子承父業,正式揸一次的士」。

黨友鄭達鴻做首個乘客

譚文豪上年3月考到的士牌,噚日首次做的士司機。佢參加車行嘅司機新入職培訓,黨友兼東區區議員鄭達鴻做佢第一個乘客,「證明我手車ok」。Jeremy學得有板有眼,佢話任何交通工具出發之前,都要做足檢查,飛機如是,的士都一樣。Jeremy亦勉勵大家,「距離目的地——自由法治嘅香港,仲有一段距離,預計抵達嘅時間暫時未知,但我相信只要香港人堅持理想,齊上齊落,好快就會到達目的地」。

另一方面,中西區區議員黃健菁近日正式加入公民黨。黃健菁話近月同公民黨喺地區事務上緊密交流,立場一致,大家合作良好,所以決定加入公民黨。黃喺區議會選舉中,以素人身分打贏民建聯陳學鋒。黃健菁話,希望日後同黨友加強合作,深耕細作,鞏固民主派地區力量。

上 / 下一篇新聞