港聞

港聞二

【Emily】DSE歷史科題目風波 CY批教協 tag埋「黑警」

【明報專訊】前特首梁振英(CY)無做特首後,改係網上月旦時事,噚日當然唔會錯過談論DSE歷史科題目,佢仲將事件扯到去警察問題,話文憑試歷史科一條題目引起軒然大波,一如「黑警死全家」、「英國來華禁煙」等醜聞,點名話教協同教育界議員葉建源對呢啲事件不但無歉意,仲強詞護短。CY鬧教協唔係新聞,但事件網上花生味濃,因為CY主動寫「黑警死全家」,仲落tag。

3小時後刪「#黑警死全家」

網民見CY言論咁勇,喺討論區留言話CY 「原來係手足,一直錯怪咗佢」、「身在曹營心在漢」、「佢係咪唔識用hashtag」等。CY出post大概3個幾鐘後,就刪除咗「#黑警死全家」,而CY嘅支持者就繼續留言撐CY,認同要「取締教協」等。

CY一直支持警察,早排有教師喺facebook轉貼「黑警死全家」藏頭文,遭學校停職,CY都唔滿意,指摘校董會接受教師「無心之失」嘅解釋,話係侮辱大家智慧,仲去信校方要求開除教師。佢今次自己hashtag「黑警死全家」,但就無回應係咪無心之失喇。

上 / 下一篇新聞