港聞

港聞二

【Emily】2021年公眾假期刊憲 清明復活節請假3日 放足10日

【明報專訊】打工仔請假「攻略」又嚟嘞!政府噚日刊憲列出2021年嘅17日公眾假期,因為下年嘅復活節連住清明節假期,5天工作嘅打工仔可以喺4月2至6日連放5日假,如果之後3日再請埋假,就可自製10日長假。另外,下年嘅農曆新年有4日假期,如另請假4天,亦可放10日悠長假期。

政府發言人話,下年嘅清明節係星期日,所以翌日(4月5日)補假,而清明節翌日同復活節星期一重疊,復活節星期一翌日(4月6日)變咗增補公眾假期。5天工作嘅打工仔可以喺4月2至6日連放5日假,只要隨後3日請假,4月2至11日就可放足10日假。

年初二勞動節聖誕節無得補

至於下年嘅農曆大年初一同初二係2月12日同13日,年初三2月14日情人節係星期日,翌日2月15日有補假,打工仔喺2月16日起請假4天,連埋周六同周日就可自製10日長假。

至於下年聖誕節假期,係由12月25日放到27日,打工仔請定之後4日假,連埋2022年元旦同1月2日嘅周六、日,就可以有9天假期。如果嫌年底太遙遠,下年5月19日佛誕係星期三,如果請2日假,都可放5日唞唞。不過,下年嘅2月13日農曆年初二、5月1日五一勞動節同12月25日聖誕節都係星期六,按法例無得補假,變相蝕咗3日假。

上 / 下一篇新聞