港聞

港聞二

【Emily】彭韻僖:政治上律師會「係色盲嘅」

【明報專訊】律師會月底改選,10人爭5個理事席位,本報早前報道,會長彭韻僖(Melissa)電郵為5名並非「開明派」嘅候選人拉票,律師會噚日召開記者會,強調自己有言論自由,以朋友身分推薦係合情合理合法、冇利益衝突。至於佢喺電郵話希望律師會去政治化,係咪指另外5名參選人政治化?佢強調喺政治上「律師會係色盲嘅」,認為法律議題不受政治立場影響。

電郵拉票惹質疑:有言論自由

至於電郵會否構成選舉不公,Melissa話係WhatsApp、電郵畀認識嘅人,反問大家同朋友溝通,如果唔係用呢啲工具,「唔通寫信?」今年因疫情關係,律師會鼓勵大家唔好親身出席周年大會,可改為用授權票、郵寄票,過往不時傳出有律師被施壓交授權票,副會長陳澤銘就話唔信壓力會影響到專業律師。

律師會亦發聲明,提到會長、副會長、理事同其他律師會會員一樣,有權喺理事會選舉中持個人意見、表達優先選擇,並按意願投票;但強調律師會不擁護任何參選人。法律界立法會議員郭榮鏗話,法官都有言論自由,但為專業不能隨意發表意見;之前律師會前會長林新強都話以個人身分發表「共產黨好偉大」意見,但會員投票都通過不信任佢嘅動議。

相關字詞﹕記者會 政治立場 壓力 郭榮鏗 自由 言論自由 香港 疫情

上 / 下一篇新聞