港聞

港聞二

【Emily】辦團購幫街坊食平啲 區議員做埋「搬運工」

【明報專訊】離島區議員王進洋早前宣布唔會參加立法會選舉,原來除咗想專心做區議員外,仲要做多份「工」,就係「義務搬運工人」。話說佢喺區內推「買平餸計劃」,希望為街坊提供「價廉物美」嘅食材,佢話東涌物價指數全港最高,最近因為疫情,仲收到好多失業求助,故希望聯同商戶一齊合作,幫街坊團購食材,慳番啲買餸錢。為減運送成本,王進洋幫手義務搬運。

王進洋:東涌物價高 跨區買餸常見

王進洋同Emily講,「買平餸計劃」籌備中,詳情稍後公布。佢話東涌位置偏遠,加上青馬大橋令運費成本高,區內物價一向好高,令街坊好頭痛,亦有好多婦女同長者要跨區去荃灣或深水埗買餸。有見及此,王進洋未做區議員時就搞過「東涌人市集」,希望以團購方式幫大家買平餸,可惜佢當時喺凍肉工場做兼職,唔小心被「刨肥牛機」切傷左手手指,縫咗6針,計劃因此停滯不前。

王進洋話將重推計劃,為保持「價廉物美」,就要減輕運送成本,佢都要落手落腳做搬運工人,未來可能要請街坊幫手做義工。

相關字詞﹕買平餸 東涌 王進洋

上 / 下一篇新聞