港聞

港聞二

【Emily】謝偉俊倡MPF「回水」一半

【明報專訊】新冠肺炎疫情重創香港經濟,立法會議員謝偉俊(Paul)認為強積金應該「回水」,佢提出兩項訴求:由政府代僱主、僱員供半年強積金,容許市民提取戶口一半款項。Paul批評強積金嘅表現「買盈富基金分分鐘都跑贏(強積金)」,強調中國人識得儲錢退休照顧自己、唔需要強制供款。

促政府代供款半年

Paul同地區組織「創建力量」委託獅子山智庫做民調,包括4月底至5月初喺黃大仙及觀塘設街站收集1521份問卷,94%受訪者贊成政府應為僱主、僱員代供款半年;89%人贊成提早提取強積金戶口一半供款。佢哋另於4月底隨機電話訪問1355人,46%人認為強積金整體表現「強差人意」、28%表示「不了解」。

Paul又話強積金有紀錄、每人有戶口可以加快「回水」,希望第三輪抗疫基金可以回應,等市民「自己供款自己救」,到時市面上就會多逾4000億資金流轉。不過,佢話每次同官員講強積金都似「黑洞」,政府一直冷淡、漠視,質疑政策係「益基金經理」,但就話佢哋唔興「行街、著黑衫」,希望可以持續游說。

相關字詞﹕強積金 新冠肺炎疫情 抗疫 立法會議員 立法會 疫情 新冠肺炎

上 / 下一篇新聞