港聞

港聞二

【Emily】慢必籌百萬告郭偉強 6個鐘夠數

【明報專訊】立法會內會上周五開會時發生衝突,人民力量陳志全抗議期間被工聯會郭偉強從後捉住衫領拖走令其跌倒,慢必前日發起眾籌100萬元,希望向郭偉強提出私人檢控,結果眾籌開始6個鐘內就達標。慢必話如果警察下星期初都無行動,佢就會向法庭入稟提出私人檢控。

話警察下周初無行動就入稟

郭偉強日前質疑慢必咁快眾籌,點解唔等埋警察查,慢必噚日交代眾籌達標時話,問呢個問題真係好可恥,指大家對警察失去信心,預咗警察唔會做嘢。不過,佢話雖然明知警察唔會做嘢,但都去報警,係想畀全世界見到,係咪藍絲打人就無事。

慢必話,佢會畀一星期時間警察,如果警察下周初都無行動,佢就會入稟提出私人檢控,講明唔會再等幾個月,「等警察扮做嘢」。佢又話,點解平日警察會即時拉示威者,仲要安排立即上庭,但佢被郭偉強襲擊、鐵證如山,警察至今都無行動。

慢必強調,所有眾籌款項都會用於私人訴訟,但暫時未知私人檢控需要幾多錢,如果有餘額就會全數捐去612人道支援基金,「絕對唔會落入陳志全個袋」。

相關字詞﹕內會 私人檢控 陳志全 郭偉强

上 / 下一篇新聞