港聞

港聞二

【Emily】元朗區會提鄉黑 鄉事派:我黑你××啊!

【明報專訊】警務處長鄧炳強噚日出席元朗區議會,多名民主派議員追問上年7.21白衣人襲擊市民事件,斥「警黑勾結」、「鄉黑」問題未解決。有鄉事派議員對於「鄉黑」一詞非常不滿,其中鄧賀年「爆粗」話:「我黑你××啊!」鄧勵東亦話「如果話鄉黑,我叉佢××啊!」

另一鄉事派楊家安要求除非有證據,會內發言不應再講「鄉黑」,區議會主席黃偉賢裁定,「鄉黑」同「黑警」詞語一樣,並非指全部人都涉黑,等於黑警只係指涉犯法嘅警務人員一樣,認為有關鄉事派唔應該對號入座。佢話唔會禁止鄧炳強講「暴徒」,所以唔會禁止議員講「鄉黑」。

鄧炳強亦畀黃偉賢同方浩軒追問係咪中國共產黨員,鄧話自己並非香港或香港以外地方嘅政黨成員。

鄧炳強話無能力做政治工作

黎國泳就問鄧炳強係咪想做特首,鄧話非常喜歡做警察,聲稱無能力做政治工作。

方浩軒亦為少數族裔發聲,佢關注前線警員英語溝通能力唔好,除咗「上番行人路」,唔識得交代執法行動,擔心非華裔市民唔明警方做緊乜。佢以英文問鄧炳強,點確保前線警員同唔係講中文嘅市民有效溝通。鄧炳強最初推搪話對方「考核英文」,又話區議會會幫手翻譯,方堅持英文係法定語言,一哥最終妥協用英文作答,話少數族裔可致電警方熱線要求翻譯。

相關字詞﹕鄉黑 鄧炳強 元朗區議會

上 / 下一篇新聞