港聞

港聞二

【Emily】律師會改選 現任理事出律師信

【明報專訊】律師會本月底改選5個理事議席,選舉仲搞到出律師信。被視為「開明派」團隊候選人陳嘉豪收到現任律師會理事江玉歡嘅律師信,話陳早前喺一個記招上提及江有新民黨背景,仲暗指江因政黨背景,喺理事會工作上有欠公允,令江名譽受損,要求陳公開道歉。陳透過律師回信,話當時清楚表明唔知江係現任定前任新民黨員,江嘅理解令人費解。

陳嘉豪團隊噚日喺facebook專頁透露收律師信。團隊話,陳嘉豪本月初接受傳媒訪問時,講到團隊無政黨背景,而即使現任理事或有政黨背景,陳亦相信所有律師會理事喺執行會務時,都可以放下自身政治立場,為業界謀福祉,點知同日下晝就收到江玉歡嘅律師信,話佢嘅言論令江名譽受損。

江玉歡喺律師信話,2016年已退出新民黨,批評陳嘉豪未核實情况,令其名譽受損,要求陳澄清言論同公開道歉。

陳嘉豪回應話,無意話江玉歡嘅「新民黨背景」會影響佢喺理事會嘅決策,純粹引此為例,話即使理事現時或曾經係政黨成員,佢都深信有關理事行使職責時會摒除政治考量。陳強調,希望各候選人或同業喺競選過程中,如有任何意見,都可以公開、坦誠同和平討論。

相關字詞﹕江玉歡 陳嘉豪 律師會

上 / 下一篇新聞