港聞

港聞二

【Emily】工作報告現「武肺」 美芬:已改

【明報專訊】自從世界衛生組織喺今年初正名「新型冠狀病毒肺炎」後,建制派議員喺立法會內多番批評泛民仍然稱之為「武漢肺炎」,認為有地域歧視。立法會議員毛孟靜噚日喺facebook話,收到市民報料,指經民聯立法會議員梁美芬喺工作報告入面寫上「武漢肺炎」。梁美芬就回應話,份報告喺今年1月寫嘅,當時世衛仲未為病毒正名。毛孟靜就話,梁美芬都係「堅持講武漢肺炎」,仲話佢都係用立法會資源去出工作報告。

梁:1月編寫 世衛未正名

梁美芬回應,有關工作報告喺1月編寫,而世衛喺2月11號將病毒正名後,已經即時將嗰份工作報告嘅網上版更新,新一批印刷版亦會更新有關字眼,統一修訂為「新冠肺炎」,佢並喺facebook上載已修訂嘅版本畀大家睇。

上 / 下一篇新聞