港聞

港聞二

【Emily】追女仔用5年 黎sir話唔算耐

【明報專訊】前沙田區議員、公民力量嘅姚嘉俊同陳敏娟,兩人「夫妻檔」服務地區多年,去年雙雙敗選區議會。近日佢哋一齊上新民黨副主席黎棟國(黎sir)主持嘅YouTube節目《過你一棟》接受訪問,大談當年拍拖史,姚嘉俊仲自爆當年追老婆足足用咗5年!黎sir就話5年都唔係好耐,「都係考驗你恆心」。

區選落敗夫妻檔 受訪談談情

姚嘉俊透露,1995年因為學攝影,加入沙田居民協會做義工,咁就識咗陳敏娟,佢自爆當年對陳敏娟係一見鍾情,覺得對方好純情、孝順又顧家。陳敏娟就話當年工作認識姚嘉俊,只係覺得對方膚色比較黑,冇乜意思,姚嘉俊第一次向佢表白時,佢都直接講唔得、冇感覺,其後兩人作為工作拍檔,就發展出友情,後來就一齊咗啦。

節目噚日播放,正值母親節,姚嘉俊仲喺節目上送戒指畀老婆,佢話因為老婆結婚冇耐就唔見咗戒指,所以一直戴住佢嗰隻先,佢諗住安頓好工作後送隻新戒指畀老婆,咁啱正值母親節,「佢付出好多,所以送隻戒指,欠咗佢一段時間啦」。陳敏娟就話平時都唔執手袋,噚日一望手袋發現有盒嘢,見到都唔開住,想畀啲驚喜自己,佢笑住叫老公要袋好啲,「等我冇咁快察覺都好啲呀」。

上 / 下一篇新聞