港聞

港聞二

【Emily】機械人落渠清淤

【明報專訊】發展局長黃偉綸噚日喺網誌介紹負責清理暗渠內淤泥嘅機械人,呢部新式遙控清淤機械人係渠務署今年初引入,會喺深水埗同荃灣試行。

渠務署工程師潘天佑話,雨水經箱形暗渠排出海,而隨雨水冲下嘅沙石、泥塵,會喺渠內積聚成淤泥,影響渠道排水,甚至導致水浸,所以署方會定期檢查箱形暗渠,確保正常運作。

年初引入嘅遙控清淤機械人,工作人員會用吊機將機械人吊起,經井口送入箱形暗渠,操作員喺工作室透過閉路電視同聲納探測,觀察渠內狀况,遙控機械人清淤。潘天佑話機械人約3米長、1.5米闊、1.5米高,運作同吸塵機相似,吸入淤泥後,會透過接駁喉管,將淤泥泵上地面嘅臨時裝卸櫃;淤泥脫水後再運到堆填區。

傳統清淤人員要入箱形暗渠內裝設同操控清淤裝置,有一定風險,多數只能喺旱季做。遙控清淤機械人可免卻工作人員進入密閉同淹浸嘅箱形暗渠,既提升安全,雨季一樣可以清淤。

相關字詞﹕機械人 清淤 渠務署

上 / 下一篇新聞