港聞

港聞二

【Emily】徐英偉:區會係好好玩遊樂場

【明報專訊】新一屆區議會由民主派主導,但上任以嚟不時出現官員拉隊離場、各區民政處拒絕提供支援等現象。新任民政事務局長徐英偉(Caspar)噚日喺商台節目話,唔認為區議會似「鬥獸場」,佢認為區議會係「好好玩嘅遊樂場」,形容遊樂場有好多要求,「有規矩大家要遵守,如果守,可以玩得好開心、可以做好多嘢」。

話守規矩可以玩得好開心

早前中西區區議會,民政處拒為一個委員會提供場地,Caspar噚日強調,原則係唔好為難秘書處同事,佢話區議會有規矩,「好難叫同事參與不合規矩嘅行為,唔好成日搵同事做磨心,大家好無辜」。Caspar話正安排同區議會見面,強調無分政治板塊。

區議會副主席要求道歉

中西區區議會副主席楊浩然要求Caspar就言論道歉,強調區議會係嚴肅,當成遊樂場係褻瀆,話對方應下台。佢又批評早前中西區區議會舉行委員會會議期間,民政事務專員一直「龜縮」、搵下屬頂替,咁樣先係搵職員做磨心。

屯門區議會主席陳樹英(Tree)批評徐英偉言論具侮辱性,「直程係你聽我話,就有得玩」。Tree話暫時局長冇約見佢哋,佢正思考就近日尖銳事宜搵佢對質,但目前未有定論。

上 / 下一篇新聞