港聞

港聞二

【Emily】單親沛然:媽媽 黑暗已過去 母親節撰千字感謝文

【明報專訊】噚日母親節,醫學界議員陳沛然(Pierre)同公民黨陳淑莊(Tanya)分別撰文,感謝媽媽一路以嚟嘅照顧。兩議員都嚟自單親家庭,其中Pierre提到父親有外遇,喺佢13歲時拋妻棄子,Pierre自此一夜長大,要負責照顧兩個細佬,媽媽就工作掙錢養家。Pierre同媽媽講,「不用怕,黑暗已經過去,苦盡甘來」。

父13歲時離家 為早掙錢曾棄讀醫

Pierre寫咗千字文感謝媽媽。佢透露,中學時曾經怕屋企無錢、讀唔完5年醫科課程,自己亦想早啲掙錢養家,諗過唔讀醫去讀工程,但因為細佬患重病要出入醫院,所以佢喺最後一刻改選醫科,大學時亦申請到full grant loan、獎學金貸款,加上做補習而捱過。Pierre憶述,中五時考到全級第一名,媽媽眼泛淚光送佢一支幾十蚊嘅墨水筆,但其實Pierre唔係好興奮,因為佢一早明白坐井觀天嘅道理,知道只有努力先可以帶一家走出困局。

Tanya割腦瘤 感謝媽媽守齋一年

Tanya亦撰文感謝媽媽。Tanya去年5月要入院割腦膜瘤,佢話當時做完手術喺ICU未醒,後來朋友轉述,由推入手術室到出返嚟,媽咪喊足5個鐘,之後一年媽媽都齋戒念經從無間斷,噚日係媽咪守齋完結後第一天。Tanya話,單親家庭嘅母女關係好微妙,兩個急性嘅女人,「媽咪嘅心思喺阿囡度,阿囡嘅心思喺政治舞台上」,但媽咪呢個後台十年如一日、不離不棄。

相關字詞﹕陳淑莊 陳沛然 母親節

上 / 下一篇新聞