港聞

港聞二

【Emily】馬會擲1.5億抗逆 資助服務弱勢項目

【明報專訊】一方有難,百方支援,疫情唔止打擊企業同打工仔,仲有慈善機構同體育組織,香港賽馬會慈善信託基金決定撥款1.5億,成立「賽馬會社區持續抗逆基金」(下稱「基金」),幫中小型非津助嘅慈善機構、體育組織,資助佢哋未來一年推行6至9個月嘅服務或計劃,每宗申請最低資助額10萬元,最高可攞到150萬元。

馬會話,期望基金回應社區迫切需要,共渡時艱。基金將支援目標為協助有需要者、或為特定群組身心健康、經濟困難而設計嘅項目,尤其服務對象係社會上較弱勢社群,如長者、殘疾者、精神病患者、低收入家庭、失業者等。機構要喺5月8日至7月15日喺網上申請:https://jccovidfund.fluxx.io

為基層長者提供免費一對一護理諮詢同身體檢查嘅關護長者協會,嚟緊都會申請,總幹事鍾少玲話構思緊有關照顧長者健康嘅新項目,因疫情下唔少長者都有心理同精神壓力,例如擔心防疫物資唔夠、家人失業等,想幫佢哋紓緩。

上 / 下一篇新聞