港聞

港聞二

【Emily】泛民見記者 自由黨區議員話違限聚

【明報專訊】政府早前租用九龍城富豪東方酒店,安排機場抵港旅客留宿等候新冠病毒檢測結果,唔少區議員跟進,但就鬧出小風波。噚日九龍城區議會開會,自由黨區議員何顯明突然高舉新聞相,話影到九龍城區議員喺酒店外聚集見記者,「涉嫌違反禁聚令」,話會交畀區議會秘書,轉交畀警方跟進。

泛民區議員:答記者問係職責

區議員李軒朗話,當日答記者提問係履行議員職責,如果咁都違例,「我好樂意收告票」。佢其後話,回應提問係「為執行法定團體或政府諮詢機構的職能而進行的群組聚集」,質疑何顯明因政見不同而公開「篤灰」,顯示限聚令打壓異己嘅本質;又同Emily講最多就上庭自辯,有信心法庭會判佢無罪。

議辦被淋糞水 警唔當刑毁

另外,疫情下大家對衛生問題特別小心,觀塘區議員鄧威文嘅辦事處門口噚日被淋糞水,佢助理報案後,警方到場處理,但就話唔係「刑事破壞」。鄧威文批評,排泄物會傳播細菌,質疑涉案者唔鍾意佢有好多途徑表達,「玩屎??」佢同Emily講,認為警察對呢類破壞行動可更積極跟進,𠵱家畀人感覺「愛理不理」,希望未來可檢控有關人等;佢又話會裝番閉路電視,唔揣測事件係咪同政見有關。警方話到場調查後發現冇財物損毀,報案人要求備案,案件列投訴滋擾。

上 / 下一篇新聞