港聞

港聞二

【Emily】10大學校長「再出發」 11學生會齊鬧

【明報專訊】「香港再出發大聯盟」今個星期二成立,公布逾1500個共同發起人名單,除咗城大校長郭位,有10間大學嘅校長都係共同發起人,引起唔少討論。11間大學學生會噚日發聯合聲明,話對一眾大學校長「向政權獻媚」表示憤慨同遺憾。

指肩負大學之名 不應入政治組織

11間大學學生會幹事會同臨時行政委員會噚日喺facebook刊登聯合聲明,譴責各校長加入「香港再出發大聯盟」,話校長作為一校之首,肩負大學之名,唔應該加入政治組織,理應站喺捍衛言論自由、院校自主之端,同學生同行;但一眾校長選擇「與共匪爪牙聯盟」,背棄學生,令人不齒。

話港人會繼續走上街頭燃抗爭烈火

聲明又話聯盟美其名「團結香港、修復社會矛盾」,但倒行逆施,抹黑追求民主自由嘅港人,加深社會撕裂,無疑出於政治考量,企圖拉攏民心,話港人會繼續走上街頭,燃抗爭烈火。

樹仁大學學生會前日亦向校監胡鴻烈、副校監胡懷中發公開信,對兩人加入聯盟表示「極為震撼及疑惑」,話胡懷中喺反修例風波向樹仁全體發信,內容開明,令民間對學校校風刮目相看,風評甚佳,𠵱家竟然加入聯盟,要求校方公開宣布退出大聯盟。

Emily噚日向11間大學查詢校長回應,截稿前均未有回覆。

上 / 下一篇新聞