港聞

港聞二

【Emily】區會紛提六四議案 民政專員唔畀

【明報專訊】六四事件31周年將至,每年六四前夕,立法會多數會辯論「平反六四」議案,不過Emily最近聽聞,立法會議程大擠塞,未必有望辯論,有幾個區議會都提出咗辯論六四議案,但就阻滯重重。據Emily所知,屯門、元朗嘅民政專員,都以議案不符區議會職能為由,未有列入議程,並講明如果傾,官員就會走人。

立會議程擠塞 未必可辯論

支聯會秘書蔡耀昌同Emily講,過往每年立法會都希望延續辯論六四議案,但今年議程擠塞。佢話今屆會提動議嘅包括屯門、葵青同荃灣區議會,因為有支聯會常委為區議員,元朗就因為黃偉賢係支聯會義工,都會提動議。

屯門區議會噚日開大會,區議會主席陳樹英(Tree)聯同18名區議員提出聯署,當中指港人多年來表達平反六四訴求,但中央聽而不聞;動議又提到「為六四慘案翻案」,又要求政制及內地事務局派員出席。Tree同Emily講,民政專員話唔能夠處理、未有將議案列入議程,佢搵番資料,過往多年區議會都有傾中港事務,但當局明言會全體代表離席。Tree話佢強調會堅持,不過據了解噚日未傾到六四,要續會再傾。

元朗區議會下周開大會,主席黃偉賢話都有提出六四事件對香港市民包括元朗區嘅影響等。黃偉賢話秘書處自行刪去六四議案,民政專員話如果到時傾,會拉隊走人。黃偉賢就強調佢會再修訂議程,又話到時會整壁報,邊個官員離席就「吸隻黑豬」落去。

上 / 下一篇新聞