港聞

港聞二

【Emily】郭家麒提「武漢肺炎」被逐

【明報專訊】世衛早前命名新冠肺炎為「2019冠狀病毒病(COVID-19)」,但唔少人仍會講「武漢肺炎」,立法會日前就出現一場爭辯,公民黨郭家麒(KK)仲因此被趕離會議室。話說前日中醫藥發展事宜小組委員會上,KK詢問食物及衛生局副局長徐德義,有冇對治療「武漢肺炎」嘅中藥做化學分析,小組主席陳恒鑌(Ben)隨即澄清,話世衛已命名為「2019冠狀病毒病」,希望議員唔好再用「武漢肺炎」,否則會裁定為「非議會語言」。

KK質疑過往非議會語言主要係侮辱議員、官員嘅用詞,問「武漢肺炎」係侮辱邊個,Ben就指涉及「污名化」,又話主席裁決不容討論。KK就話「傻嘅真係」,其後拒絕收回言論,所以被Ben逐離場。

過往「不當言詞」多屬侮辱人字句

翻查資料,過往被裁定不適宜喺議會使用嘅言詞,包括「X街」、「狗官」、「狗屎法律」等。

KK向Emily強調,以地區命名嘅疾病包括「日本腦炎」、「德國麻疹」等,都只係講疾病起源而無貶義,質疑Ben嘅做法可能反映佢同大陸都心虛、唔想揭自己瘡疤,但認為愈係咁樣,公眾只會更加認為大陸要負上最大責任。佢話自己會繼續講「武漢肺炎」,又話議會應該互相尊重,質疑Ben聽到「武漢肺炎」就咁大反應、趕人離場,係濫用主席權。

相關字詞﹕郭家麒 陳恒鑌 新型冠狀病毒肺炎 武漢肺炎

上 / 下一篇新聞