港聞

港聞二

【Emily】許正宇見財經Panel正副主席

【明報專訊】政府上月底換咗5個局長,唔少議員都同Emily講,新局長都有同佢哋打招呼,其中財經事務及庫務局長許正宇近日亦同議員見面,本身屬民建聯嘅佢,同泛民議員亦有偈傾。會計界立法會議員梁繼昌(Kenneth)噚日喺facebook上載相片,話上周同許正宇會面,同行仲有經民聯議員張華峰。張華峰同梁繼昌係立法會財經事務委員會正、副主席。

梁繼昌話,佢向局長清楚表示,疫情下如會計師要往返內地工作安排,必須係自願性質,僱主要以僱員健康為最優先考量等。而財庫局嘅facebook噚日就話,許正宇去咗政府物流服務署,感謝一班「幕後英雄」同事,話佢哋喺疫情最嚴峻時仍緊守崗位,喺採購口罩等防護裝備、印製防疫資訊,以至提供車隊運送物資和安排接載市民出入檢疫中心上都盡心盡力。

另外,新任政制及內地事務局長曾國衞噚日去咗工聯會寄藥予內地港人嘅中心視察,並同工作人員及義工打氣。

相關字詞﹕梁繼昌 許正宇

上 / 下一篇新聞