港聞

港聞二

【Emily】明報潘樂陶偵查報道 奪恒大商業新聞銀獎

【明報專訊】由香港恒生大學舉辦嘅第四屆「恒大商業新聞獎」,大會話今年收到超過500份參賽作品,反應十分熱烈,但因應新冠病毒疫情,今年改為網上公布得獎名單。明報偵查組憑住「水署億元工程 未招標批潘樂陶公司」(見圖)嘅系列報道,獲得最佳商業新聞系列報道獎(文字組)銀獎。評審之一、廣播處長梁家榮稱讚報道「新聞價值高,資料仔細」。

梁家榮讚「新聞價值高,資料仔細」

雖然今年無頒獎禮,不過得獎同事都想藉住呢個機會分享幾句感言:「做到一隻好古仔,除咗好靠團隊合作,亦必須多謝各方協助將真相公開。」佢哋仲話,做呢隻古仔嘅過程特別深刻,既要不斷向各方了解事件同翻查相關資料,又要多次同政府交涉,先證實同完成到呢個系列報道。

上兩屆都有出席頒獎禮嘅財政司長陳茂波,今年特別錄影鼓勵得獎者,又讚記者努力不懈咁發掘新角度、新視野,為讀者帶嚟更深入同具啟發性嘅思考。

相關字詞﹕水務署 潘樂陶 恒大新聞獎

上 / 下一篇新聞